[DOWNLOAD] Dalaw Patron sa Kapitbahayang Katoliko Booklet!
dalaw-patron img

ANO ANG DALAW PATRON SA KAPITBAHAYANG KATOLIKO?

Ang Dalaw Patron sa Kapitbahayang Katoliko ay isang gawain na inilunsad ng Diyosesis ng San Pablo noong 2016 na naglalayong mapalapit, makalapat, at maipanumbalik ang sigla at pakikiisa sa pananampalataya ng bawat kasapi ng Simbahan. Hangarin nito na maabot lalot higit ang mga nasa laylayan, ang mga mahihirap, kasama na ang mga nananamlay sa buhay pananampalataya. Nais din nitong maabot ang mga taong hindi binyagan at maiparating sa kanila ang Mabuting Balita ng Kaligtasan.



ANG PAGSISIMULA NG DPKK SA DIYOSESIS

Ang DPKK ay hindi isang organisasyon na dadagdag pa sa mga napakaraming samahan na nakatalaga na sa bawat parokya. Ito ay isang gawain ng Diyosesis ng San Pablo na naglalayong pukawin at mag ningas muli ang buhay-pananampalataya ng bawat Kapitbahayang Katoliko tulad ng naranasan ng mga apostoles noong Pentekostes.

Sinimulang ipalaganap ng DPKK ang pagpapakilala ng patron ng ating Diyosesis – si San Pablo, Unang Ermitanyo sa pamamagitan ng pagsasaad ng kanyang buhay at halimbawang kabanalan. Ito ay naayon sa paghahandang ginagawa ng Dyosesis para sa pagdiriwang ng ginintuang taon ng hubileyo (Golden Jubilee).



ANG PAG-USBONG NG MGA DPKK CLUSTERS

Unti-unting sinikap ang pagbuo sa mga ilang parokya ng mga “Klasters” o grupo ng tig-sampung pamilyang magkakapitbahay upang magnilay sa Salita ng Diyos sa pamamagitan ng mga ipinamamahagi ng Diocesan Pastoral Office ng Lingguhang DPKK “Liturgical Bible Study Guides”.

Habang patuloy na ipinalalaganap ang adhikain ng DPKK sa ibat-ibang parokya, sinikap nitong lalo pang mapalalim ang mga kaalaman patungkol sa gawain ng Basic Ecclesial Communities sa pamamagitan ng pakikilahok sa mga National Conventions ng BEC na inilunsad ng CBCP Committee on BEC.



I-DOWNLOAD ANG DPKK BOOKLET

Ang DPKK ay isang tugon sa panawagan ni Papa Francisco na “lumabas, makipag-ugnayan at makisalamuha” lalo na sa mga nanamlay ang pananamplataya at sa mga panabi o laylayan ng lipunan upang maramdaman ng mga ito ang pagpapahalaga at pagkalinga ng Inang Simbahan at mapag-ampong Awa ng Diyos.